輕磅馬呢晚整體表現佔上風,早段場次有「路路發」同「公証揚聖」贏馬,尾口孖寶亦由「金滙龍華」及「愛寶」一對輕磅大冧巴馬包辦。
當中「愛寶」於第八場三班千二米,正係恃住磅輕一放到底,造就騎練霍勵賢同徐雨石齊齊開齋,打開今季勝門,反而掛頭牌全場最重磅之文廐「人和家富」,阿巫發揮到一絕,但都係功虧一簣,追足半條直路仍鞭長莫及只得第二,文、巫繼第六場贏「常勝龍王」後未能起孖,「人和家富」本身亦唔可以取得跨季連捷。
今場第三名由「大運舞台」後上拎到,第四名係熱門之一「帝國勇將」,四重彩21,971元。
總結全晚成績最好騎師係得一冠一亞兩季之巫斯義,勝出騎師王。表現最曳係雷神,全晚出七駒僅第四場「大寶庫」季軍及第六場「珍珠旺」得第二,後駒漏閘轉彎兜大圈累事應贏變輸,尾場雷神騎「皇者拍檔」更加大熱冇影,輸到馬迷眼癱癱!