星期日到馬會飲茶，非常熱鬧，一張空枱都冇。入門就碰到馬主P，佢話佢自己與團體有兩隻新馬運到，連埋舊馬，共有四隻，預備兩隻擺響沈集成馬房，兩隻放入新練馬師賀賢嗰度，睇吓邊位練馬師交出頭馬喎。馬主P素來都有運，下季一定有頭馬贏嘅，不過佢話同自己行得埋嘅馬主，今次抽籤全部落空，大家都好失望喎。
擰轉頭又見到幾位工程師帶同家人嚟飲茶，多口問句：「近來生意好嗎？」佢哋立即揦埋口面，工程A話：「等緊炒魷。」顧問工程師B話：「等緊執笠。」工程C講：「冬姑唔下台，我哋會俾人打橫抬！」乜咁激呀？冬姑係山東、四川毒菇咩？

三位工程師異口同聲咁話，冬姑只管環境、環保，對運輸工程冇乜興趣，乜嘢大project都㩒住唔開工，沙中線（即九鐵贏咗地鐵，話要建設嘅沙田中環鐵路）已經無限期擱置。顧問工程師去見冬姑，問佢有乜政府工程快將推出，冬姑不置可否，一於懶理。所以咯喎，顧問公司已經個個星期炒人。
佢哋討厭冬姑之餘，連工程界議員何鍾泰都憎埋，認為如果有人挑戰佢，取勝機會有㗎，工程師對何鍾泰好失望，選個新仔都冇所謂。咁樣講，選個民主派得唔得呀？佢哋話：「咪講笑，我哋靠政府食飯，又要北上靠祖國工程，邊個工程師夠膽自認民主派呀？未死過呀？就算心裏贊成民主，為咗飯碗，都唔敢講出聲啦。」既然如此，何鍾泰雖缺民望（工程界選民），對手只有一位陸宏廣，仍有機會連任。