新城出身的林盛斌（Bob）入行16年，當年大專畢業後加入電台擔任營業部推銷員，9個月後才轉做DJ，憑主持《新香蕉俱樂部》節目上位，其後更過檔大台成功入屋，拍劇、拍戲、做主持身兼多職，今日阿Bob在社交網自爆當年做sales時，每月人工有6、7萬元。

阿Bob寫道：「我人生第一份工，就係喺電台做Sales。當年我嘅銷售成績，今日回想番，算唔錯，由起初底薪6、7千蚊，只係短短半年時間，到我離職嘅時候差唔多出緊6、7萬一個月，以一個啱啱大學畢業出嚟做嘢嘅死o靚仔嚟講，直頭係好似人生大贏家咁！」

自覺是人生大贏家的阿Bob，分享成功之道：「點解我可以做到？因為我好明白一個道理：『我唔係打緊一份工，我係經營緊我嘅生意。』如果你只係當一份工，你得到嘅只係人工；如果你當係自己生意，你得到嘅就係利潤同回報。當你好重視你盤生意，覺得間公司你都有份嘅時候，你嘅目標、你嘅心態、你嘅想法、你嘅行為，同『只係當自己打份工』會有好大嘅分別，而呢個分別，經過一段日子，就會帶嚟好唔同嘅結果。」

許亦妮留言讚他講得好好，有網民更葡萄表示：「6、7萬都離職，而家肯定係賺緊60、70萬。」、「心態決定一切」。

-----------------------------
《2019高級珠寶鑑賞誌》
點擊即睇過百款鑽飾名錶
-----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇