噚晚劉德華喺九展舉行「2018華仔天地30周年晚會」，過千位華仔fans出席，現場保安森嚴，大部份fans來到現場喺華仔backtrop前影相留念，有fans戴住印有ANDY嘅頭飾入場，十分興奮。

據知晚會一如既往，首先會有切蛋糕環節，華仔喺台上先向過千位fans發言，華仔大概話︰「好感謝大家撐咗我咁多年，今年fans club成立30年，有fans跟足我30年，佢哋由細路仔到少女，之後結婚變咗師奶到中年，依家仲帶埋下一代嚟，好感謝大家。」現場還會向滿十年嘅fans獲華仔送贈用金打做嘅老人牌，滿廿年則送金嘅長老牌，不過噚晚未有fans獲卅年牌，估計明年才頒贈。

除咗華仔發言，每年晚會嘅高潮就係上台切蛋糕儀式，華仔嘅家人一一上台見fans，好似劉爸爸劉媽媽，仲有太太朱麗倩同愛女劉向蕙。劉爸劉媽十分健壯，而且每年都由劉爸爸負責開香檳。至於朱麗倩同女兒，同樣穿上淺色連身裙，以往向蕙年紀小，由華仔或家人抱住上台，今年向蕙則由媽媽拖住，自己行上台，自小見慣爸爸大批fans，所以向蕙顯得好淡定。除了家人，華仔好友黃蕊、余錦遠，同埋鐵粉歐陽妙芝，都有上台一齊影大合照。

切完蛋糕，就係華仔演出嘅環節，佢嘅家人全部坐喺台下欣賞，據知向蕙乖乖坐定定睇爸爸演出，華仔亦喺台上同fans透露，佢日日對住女兒唱歌，所以向蕙已經見慣不怪，而華仔唱足個幾鐘，儼如一個小型音樂會。

精選娛聞，喺晒《娛果》
http://fb.com/appledailyent