當年今日

緋聞女主角又多一個
傳羅嘉良婚變阿佘係真兇

蘋果日報 2002/07/10 00:00


羅嘉良與太太方敏宜結婚四年,昨日有報道指二人鬧婚變,並暗示宣萱為第三者。而嘉良則坦承婚姻確實出現問題,至於方敏宜也揚言正與丈夫處於冷靜期,但她卻相信宣萱無辜,但據悉佘詩曼近日亦和羅嘉良過從甚密。
羅嘉良(撈家)與宣萱向來老友,故昨日有報道指撈家與太太方敏宜婚姻觸礁,連帶宣萱亦被拖落水,該報道指撈家跟太太結婚四年多以來,二人感情早已轉淡,但撈家因疼錫兩歲愛兒,故遲遲未決定離婚,直至早前他請教風水師陳伯後,撈家才有所決定。

拒談兒子撫養權
撈家近期受家庭問題困擾,有傳因此而令撈家與宣萱友誼升級,昨日有大批傳媒於撈家寓所外守候,結果惹來管理公司及村民投訴,要勞動警方到場趕車。而撈家終於現身接受訪問,他說:「我對嗰篇報道覺得好遺憾,我係處理緊同老婆嘅問題,但一對夫婦相處咁耐,一定有問題發生,生活上有啲嘢,我哋配合唔到,不過到目前為止,我哋都冇辦過任何手續。」對被指與宣萱在化妝間一同換衫之說,撈家說:「我唔講呢啲失實報道,會影響人哋嘅人格同聲譽。」而撈家亦拒絕透露有關兒子的撫養權問題。
其實圈中除了傳出撈家與宣萱有緋聞外,另一個版本則是傳他與佘詩曼拍《七姊妹》時,兩人已種下情根,撈家昨日笑說:「冇啲咁嘅事,唔好噏得就噏,唔好每日加一個女藝員畀我,唔好再拖其他人落水啦。」
羅太信丈夫磊落
而撈家太太方敏宜昨午如常離開清水灣寓所,乘的士返有線電視上班,問到她是否與撈家分居?她說:「冇,但我哋兩公婆需要時間冷靜。」再問她對宣萱被指為第三者的傳聞時,她即說:「我對呢件事唔好意思,我同宣萱都好熟,當佢好似妹咁,但拖咗佢落水,佢哋冇嘢㗎,我相信佢兩個都係正人君子,咁講係侮辱佢哋嘅人格。」而她更稱撈家正於家裏睡覺。
此外,宣萱昨早於電視城拍攝《戇夫成龍》一劇,而她更以日本妹造型示人,但宣萱卻未因傳聞而憤怒,只表現得甚為無奈,她說:「成篇報道都係作嘢,乜都話聽人講,又冇證據又唔問吓我,有證據我一定會面對,話我成日喺公司同撈家食飯,我好耐冇見過佢,係上次喺電視城餐廳,撞正撈家《衛斯理》試造型,至一齊食餐飯,話我同佢一齊喺服裝間換衫重離譜,咁多服裝間職員喺度,我雖然男仔頭,但都唔會同個男性一齊換衫,撈家嘅家事我nocomment,但啲報道咁講對我影響好大,會破壞形象,真係好過份。」
採訪:朱芷瑩、楊潔雯