富士電視台揼本開拍「月9」檔新劇《貴族偵探》，起用嵐成員相葉雅紀擔正做主角，演員陣容有中山美穗、武井咲、井川遙、生瀬勝久、瀧藤賢一及仲間由紀惠等演出，每集製作費高達710萬港元。

不過自劇集播映以來收視未如理想，除咗首集錄得11.8%收視，第二、三集收視都跌到單位數，富士惟有諗計搵串星救亡，邀得橋本環奈同釋由美子客串一角，電視台宣佈嚟緊播出嘅第五同第六集，將會有加藤愛助陣，佢自2015年9月生B後已經減少藝能界工作，只參與廣告活動，今次係佢相隔三年再拍劇，亦係佢產後再參與日劇拍攝。

劇中加藤愛飾演一位名門千金，係連續殺人案嘅關鍵人物，今次亦係佢相隔五年再與相葉雅紀合作。