立法會港島區補選越嚟越熱鬧，噚日再多一人宣佈參選，隨時出現混戰局面。
最新參選人係落馬洲中港貨運聯會主席蔣志偉，以獨立人士身份參選嘅佢，批評各黨派只顧黨爭，佢嘅政綱包括支持2012年雙普選、捍衞基層福利、關注中產同監察政府。
兩名阿太來頭大，蔣志偉話未驚過，表示以往為業界爭取權益有成績，唔比兩太遜色，佢參選亦令市民有另類選擇。佢話有商界同政黨人士以個人身份支持佢參選同捐款，預計最少有200個提名人，希望籌到60萬元經費。外界估計佢參選係為出年角逐立法會航運交通界議席鋪路，蔣志偉冇正面回應，只話曾接觸現任議員劉健儀，對方支持葉劉。