近年主力拍電影的鄧麗欣（Stephy），早前為ViuTV拍攝新劇《男排女將》，劇集即將出街，而主題曲《著地》亦由Stephy主唱及填詞，她更邀來黃貫中（Paul）作曲及監製。

Stephy早前到Paul的錄音室為歌曲進行錄音，對於和Paul首次合作，Stephy 坦言十分緊張：「好驚俾佢Ban我啲詞。中間我哋都有溝通過，首歌要點唱，過程中我都好驚自己用詞不當，唔識用音樂語言同佢溝通。」怎料Paul大唱反調笑言：「唔好講到我好惡咁喎，其實佢（Stephy）一啲都唔驚我，有時會同我爭論吓，有交流先好呀，唔係我話乜就乜。」

Paul坦言和Stephy錄音，進度比預計時間快完成：「證明掂先會早收工，Stephy比我想像中好好多，我冇必要擦鞋，真說話嚟，佢好舒服地錄晒成首歌，冇需要逐句逐句錄。」已有7年未有填詞的Stephy，今次為新歌《著地》再度「出山」，主因自己是劇集主角，對整套劇有較深刻印象，題材又涉及喜愛的排球，因此最後拍板由自己填詞。她笑言：「其實係因為冇錢搵填詞人，咁可以幫公司慳返筆，哈哈！」錄音接近尾聲時，Paul老婆朱茵「突襲」錄音室探班，她大讚Stephy唱功了得，在旁的Paul嗲老婆說：「我呢？讚埋我啦！」

-----------------------------

《蘋果》英文版免費試睇： 了解更多

英文版已登錄《蘋果》App，立即 下載/ 更新 ： iOS / Android

-----------------------------

支持蘋果深度報道，深入社區，踢爆權貴，即Like 蘋果專題及調查組FB專頁 ！