好喇，繼續都係高志森大大大大導演，為大家介紹番，下月一號同二號嘅文藝晚會同青年音樂會有乜嘢節目睇，同係咁易講下千二萬點使。

高志森愛國愛黨，但佢為咗香港人嘅福祉，唔怕死突破黨嘅「禁韓令」，使大嚿錢請佢口中嘅「In佛甩」 (INFINITE)來港演出賀國慶，而呢筆錢，仲係佔千二萬成本嘅一大部份——高志森自己都認0架。

高志森好霸氣咁爆一句「話晒呢個係香港慶祝中國國慶文藝晚會，香港同胞慶祝中國國慶，咁呢度係香港啦！」啱呀，香港仲有一國兩制0架！

但係呢，試問娘親生日，點可以俾韓國出晒風頭0架？於是高志森又巧妙咁搬出「民意」，讓大家可以欣賞駐港解放軍文工團精采演出，而且今年嘅演出篇幅，會係歷年之最。

「咁見到咁多年嚟好多聲音話，因為我哋普羅市民一般唔係咁輕易睇到駐港解放軍文工團嘅演出，過去都係七八分鐘，今年我向佢哋要求，增加到十一分鐘。其他嘉賓嘅演出時間今次我哋揸到好緊，係文工團演出就加到十一分鐘，呢個都係吸收觀眾反應之下，我做咗一個調整。」

究竟高志森喺邊度「收集」到呢啲民意呢？

至於成本，重點嚟喇，製作費係幾多？高志森本想拋個波俾籌辦嘅中總會長蔡冠深，但佢補充話：「純製作費，十月一號晚同十月二號晚，要千二萬，未計場租。同過去一場，場租政府有參與嘅，民政事務局都係主辦之一。」係咪歴年最高？「我唔知。」咁係咪你主辦過嘅歷年最高？「我相信呢個肯定係一個幾大嘅製作啦。」

「我相信」而又「肯定」但只係「幾」嘅「大製作」……頂頭盔…

「你雖然你係講兩晚，但其實佢唔係反映佢實際嗰個成本，實際嘅成本係咩呢？十月一號晚好多都係拍膊頭，好多參與呢啲都唔會計到好足，同埋呢個國慶文藝晚會一向都有拍膊頭嘅傳統0架喇，哈哈，我係其中一個去拍膊頭嘅，同埋啲歌星韓星都唔係收足嘅。」

高志森又話：「你賣得幾錢飛？你賣得嗰一百蚊二百蚊，佢都知道你係慈善，近乎慈善性質。」咁最重皮係邊度？「咁梗係『In佛甩』啦！歌酬呢，仲有食住行呢？」

有份演出「青年文藝晚會」嘅坤哥，被問到驚唔驚政治敏感？及對於駐港軍民工團表演時間仲長過歌手唱歌，坤哥回覆傳媒表示：「我都係唱歌畀大家聽～同埋有唔同界別嘅表演都豐富個演出呀！」

同樣有份演出嘅胡琳就以短訊回覆：「我應該係一號做，個show係公司接，我只知道我會同一隊acapella一齊唱中文同英文歌，已經排練過一次。之前未試過同acapella合作過，都幾好玩。但其它有乜表演，我就唔清楚喇。」