由緋聞情侶姜東元同宋慧喬主演嘅新戲《我的忐忑人生》嚟緊下個月就會喺韓國上映，近日佢兩個都忙上唔同節目為新戲做宣傳，而前日佢兩個就通過韓國大型網站naver搞咗個live嘅聊天活動，透過網路同一眾網友見面。

活動上，姜東元同喬妹就接受網友提出嘅問題，抽出嚟進行解答，成個活動足足收到接近17,000條問題，可見呢對為緋聞情侶有幾勁呀。姜東元喺活動上就自爆自己為新戲增磅喇。姜東元：「因為我今次扮演爸爸角色，覺得要增加少少體重，所以喺拍之前就不停食嘢，亦有做少少運動配合，就增咗10kg。」

亦有粉絲問到佢人生中令佢心跳加速嘅瞬間時，姜東元就好大膽，完全無視坐喺佢隔離嘅緋聞女友喬妹咁話：「喺街上面見到靚女嘅時侯會心跳加速，仲有喺初初入伍時，第一次去浴室同300個軍人一齊沖涼，大家都只係望住我嗰時，哈哈。」

另外，姜東元又即場玩踢爆，話覺得喬妹係咁多個女演員之中應該係最識鬧人嘅一個女星，搞到喬妹尷尬笑，姜東元話：「通過今次作品，我見到佢鬧人個樣，仲見到佢好似女中豪傑咁嘅樣，所以我覺得佢係我見過嘅女演員中最識鬧人嘅一個。」