大陸劇《還珠格格》自98年首播，至今已經有兩個版本，除了趙薇、林心如分別演過小燕子及紫薇，另一個版本就係李晟同海陸。出品人瓊瑤日前宣佈會再翻拍，今日網上就流傳一份名單，仲話演唱嘅定妝時間係今年12月。

劇集最重要嘅人物，當然係最主要嘅角色小燕子，而流出嘅名單所見，呢個角色會由大陸演員楊紫演，至於紫薇一角，就話人選會係張馨予，其他角色，好似同小燕子一對嘅五阿哥永琪，以前演過嘅有蘇有朋同張睿，而「第三版」五阿哥，名單話由王鶴棣出演，亦即係新版《流星花園》入面嘅道明寺，不過同時又傳聞范冰冰細佬范丞丞都有機會演出。

對於以上呢個演員名單，有關方面回覆大陸媒體，就話唔知呢個演員表邊度流出，張馨予都有喺網上留言話「這麼彪悍彪悍演不了柔弱的女字。」如此一說，即係話呢個演員表，好似唔係好堅喎！新版《還珠》劇組人員亦澄清謂：「選角還沒開始，網路流傳的定妝表是假的。」

精選娛聞，喺晒《娛果》
http://fb.com/appledailyent