【大導新作】李安搵埋韋史密夫拍驚悚片打複製人
李安韋史密夫
韋史密夫曾經於《智能叛變》(I, Robot)都打過智能機械人,不過今次就變咗打複製人。
《比利.林恩的中場戰事》玩每秒120格、3D加4K超高清攝影,衝擊視覺。
大導李安每部作品都有唔同題材唔同片種,繼上年推出《比利.林恩的中場戰事》(Billy Lynn's Long Halftime Walk)之後,派拉蒙影業噚日就宣布,將會於2019年推出李安執導嘅動作驚悚片《Gemini Man》,男主角仲係韋史密夫(Will Smith)!
故事中,韋史密夫係一名上咗年紀嘅殺手,本來打算金盆洗手,卻發現自己陷入一場終極戰鬥之中,就係要同後生過佢25年嘅複製人對決,故事吸引,備受外界期待。
《Hollywood Reporter》指出,《雙子男》籌備其實超過20年,迪士尼1997年本來諗住會拍,並由《壯志凌雲》( Top Gun)導演Tony Scott執導,可惜最後因為技術問題擱置,Tony Scott仲於2012年跳海身亡。隨住電腦特技日漸成熟,Skydance電影公司舊年重啟計劃,佢哋認為李安於《少年Pi的奇幻漂流》(Life Of Pi)及《比利.林恩的中場戰事》中做視覺特效非常出色,所以邀請佢執導呢部動作驚悚片。《雙子男》預定2019年10月4日上畫。