當年今日

馮仁昭四圍超:
同班同學 反攻東京 - 馮仁昭

蘋果日報 2015/09/30 00:00


第28屆東京國際電影節噚日公佈入圍名單,華語片只有內地新銳導演郝傑執導、包貝爾同孫怡聯合主演嘅青春片《我的青春期》入圍主競賽部份,而彭浩翔監製、《春嬌與志明》編劇陸以心處女執導嘅《同班同學》就入咗亞洲未來組別競賽部份,之前麥浚龍執導嘅《殭屍》都試過入圍呢個組別,仲有林超賢嘅《破風》就入咗世界焦點單元。香港導演吳宇森同日本名導山田洋次將獲頒「武士獎」,表揚佢哋對電影嘅貢獻。
彭浩翔:係大嘅肯定
第一次做導演就得到國際影展賞識,陸以心梗係好開心,下月中佢會同彭浩翔會領3位女主角郭奕芯、廖子妤同麥芷誼飛去日本出席電影節開幕禮行綠地毯。
呢輪忙緊籌備新戲嘅彭浩翔,噚日同馮仁昭講:「《同班同學》入圍東京國際電影節真係好有意義,因為電影故事入面講緊嘅援交正正係源自日本,再擴展到世界,喺當地舉行世界首映真係好貼題。呢部片雖然起用新導演同新演員,但我認為佢哋表現超水準,今次就係一個好大嘅肯定。我會形容呢部戲係一部『青春少年成長殘酷物語』,充滿真實感。」
電影公司噚日仲發放咗製作花絮,包括公開片中3位女主角同導演喺電影開拍前嘅禁室同居生活,最爆笑係郭奕芯掹咗屋企雪櫃插頭,俾同居嘅室友投訴佢生活習慣好離譜。
撰文:馮仁昭
empty
林超賢嘅《破風》入圍世界焦點單元。劇照