今戰（10日）國際賽盛事，用全闊Ａ跑道，後上馬唔怕塞；近日風和日麗，場地情況正常，今屆少了澳洲代表，但其他地區仍踴躍參與，論實力及狀態水準，日本隊陣容強大，可優先留意。至於本港代表，大摩、蔡約翰及告東尼都派出強陣應戰，莫雷拉則手握重兵。

第六場二班1200米，「同樂日」馬主是鄭家純，此匹沈集成馬房灰馬，外地跑六場，得一冠兩亞兩季，贏馬路程是1400米，1200及1600米則上名，據聞幕後自視甚高，目標是跑今季打吡。「同樂日」自九月份開操，由第一課快工夫開始及三次試大閘，只有一課操練是由助手代出跳，其餘莫雷拉都親力親為，重視之情可見。經悉心操練，減肥漸上力，試閘以草閘表現較佳，泥閘則稍遜色，排位朝落草地考驗，末段衝刺力強，狀態起得恰好。既然想進軍大賽，就要博表現，今仗先騷騷哥利。

同場「幸運美金」上回在三班負重磅入Ｑ，負於頗銳之「僥倖」，對手轉谷戰再添一Win，可見水準高，返二班孭輕磅有助，可爭三甲。「彩福」連課跟「明月千里」拍跳，本身狀態逐步回起，田草1200米是最有把握路程，可介入一戰。「駿明珍寶」新勝猶勇，抽排好檔位，有機會賺形勢爭入一席。「添好運」試閘大把在手，狀態相當弗，但泥地才有把握。