葉楚航今朝大舉練兵，共有31匹馬出大圈跳，包括周三上陣馬，七點耙地時又與韋達傾一輪，傾乜？唔知，只知二人今次合作馬只有尾場「定做領袖」。上次要有幾慘有幾慘，先是排位執籌，抽十檔，未落場跑已肯定蝕章，無速度搶欄，只有起步拖後留住追一個跑法，雖見韋達發揮超有誠意，好有心機，真的能夠楔入內欄，決定沿欄追亦無錯，可惜最後100慘食三文治，無空位要抽住過終點，最後跑梗頸四。錯失了，要再等機會，葉楚航處理十分小心，安排唞夠四日才復課，直至今朝才由韋達跳番課，睇見體質偏弱的「定做領袖」，完全無轉瘦，放心晒！今場對手，其實比上次稍強，有「摯友無敵」、「御皇鷹」及「帝聖好好」，加埋上次有運才跑贏牠的「香港神駒」，四駒全抽八檔以外，相反「定做領袖」抽四檔，睇來睇去，只有隔離五檔的「喜喜寶」最惡，且看冇得跑國際騎師賽的韋達，可否執番個安慰獎。
韋達冇份跑騎師賽，第四場佢騎開的「自成一格」要換人，一直苦無突破好恨贏，今次終於求變，決定加眼罩博一博，抽配夏偉卓，好唔好見仁見智，抽到一檔卻戥番勻。