天王劉德華本月27號55歲牛一，一如之前咁啦，華仔除咗同家人一齊慶祝，仲有「家人」——「華仔天地」會員！噚日佢嘅歌迷會就率先喺九展舉行生日會，為華仔提早慶祝。(新聞連結: http://bit.ly/2cvtalI )

大會喺場外準備咗個華仔巨大相框，畀fans拎住影相，等大家未出發先興奮。入到去見到真人，當然係更加開心。今日凌晨時份，華仔仲馬上將靚相放上華仔天地個page，同家人分甘同味。相中當然係以女性fans居多啦，有歌迷仲帶埋小朋友嚟，唔使估豆釘們都係聽華仔嘅歌長大0架啦！只見華仔按手在小朋友頭上，父愛盡現。

上開華仔天地官網，仲見到「華仔天地」2017月曆原來已經出咗，華仔仲細心地拍埋花絮片，造型多多，仲包括示範工人褲的正確著法………正過雞排妹！肯肯定！

介紹番，華仔喺月曆花絮片裡面，講嘅呢番話，原來明年月曆主題係Make Things Better，希望每一個月帶俾大家唔同嘅訊息，令大家感覺到一班兄弟姊妹心裡面有一個理念，就係「眾生為念，少就是多」。華仔話:「希望你哋明白，其實擁有一件衫，或者一滴水，享受大自然，其實都唔係必然嘅事。希望大家珍惜而活得福氣。」

有道理。