22歲伊朗小將華法爾（Hossein Vafaei）雖然喺中國公開賽八強以5:3擊敗名將鄧立普，但佢喺周六舉行嘅四強賽事就冇咁好運，以局數1:6輸畀威爾斯老將威廉士。

不過，中國球手梁文博早前就喺微博分享華法爾嘅故事，仲呼籲一班球迷都支持吓佢。原來華法爾係伊朗現時唯一一位職業桌球手，雖然佢曾經攞過兩屆世界業餘錦標賽冠軍，仲贏過亞洲錦標賽，但英國駐伊朗大使館就遲遲都唔肯幫佢簽證，令到華法爾錯過咗好多去英國打職業球賽嘅機會。不過，華法爾為咗成為職業球員竟然賣埋自己部車，而且幾乎用晒自己嘅存款，但係都冇放棄過打桌球。