隨住鄧肯（Tim Duncan）退休，馬刺嘅GDP組合雖然贏過四屆NBA總冠軍，不過都準備換班，好似39歲老將真路比利（Manu Ginobili）放售緊位於聖安東尼奧嘅大屋，睇嚟打埋今季就退休，返老家阿根廷享福。
其實真路比利今夏都傳過跟隨鄧肯退休，最終接受咗馬刺1,400萬美元嘅一年約，但佢應該今季後就唔再打喇。聖安東尼當地傳媒周四報道，呢位第六人正將位於阿拉莫市嘅大屋放售，索價200萬美元（約1,500萬港元）；Manu由2004年已經住喺呢間6,000幾呎嘅大屋，同佢共度球員生涯咁滯，今次肯割愛，且怕都準備退休。

當然，馬刺今時今日有尼納特（Kawhi Leonard）冒起，連較為年輕嘅GDP成員柏加（Tony Parker）都退居二線，相信就算三人真係全身而退，都唔太影響球隊。好似周四NBA常規賽，尼納特連續兩仗得分都有三字頭，貢獻30分，帶領馬刺以102:94作客擊敗帝王，開季兩連勝。
同日其他戰果，公牛首度出戰，面對東岸強敵塞爾特人，主場以105:99勝出。公牛新兵獲迪（Dwyane Wade）攻入22分，而另一新兵朗度（Rajon Rondo）對住舊東家就好好火，仲同綠軍後衞I湯馬士（Isaiah Thomas）發生衝突㖭。