已有一女嘅模媽余曉彤（Hidy），去年陀女未能參加ViuTV嘅真人騷《G-1格鬥會》， 近日ViuTV製作兩集嘅《G-1格鬥會挑戰賽》，將於下周一同周二晚播出，獲邀作賽嘅除Hidy外，仲有劉家良徒孫何慈茵（Charlene）同格鬥女郭思琳。Hidy最早出局，Charlene火拼郭思琳，最終郭思琳奪得「金腰帶」。

Hidy今日同《蘋果》講番呢次賽事，話花咗4個月操練，佢承認最初以為跟郭思琳對打，特別因應佢拳技去調整：「思琳手長腳長，所以要打埋身戰，佢下盤冇咁強，我諗住專攻佢，點知結果唔係對佢。」

Hidy上陣要向Charlene挑機，Hidy話：「佢係武術世家，我只好盡量提自己要放鬆，因為我自問越大壓力，就會反效果，放鬆去做反而更好，我賽前冇起對手底，只係練好自己。比賽前半小時開始騰，潛意識好緊張，直至中拳，眼前出現白光，我聽嘢有回音，好暈好暈，右眼中拳，甩con，呢個狀態維持到尾，感覺幾恐怖。」

Hidy臉部都出現傷痕，但佢覺得打一場硬仗好爽，雖敗猶榮，佢話：「比賽完感覺太難忘，成晚瞓唔着，回想番練習日子，自己生活身形好大變化，呢次係難得機會。」