特首林鄭月娥今午宣佈中小學將於5月27日起分階段復課，中三至中五會先復課，小四至中二則於6月8日復課，幼稚園K3至小三隨後於6月15日復課。就讀中二的Charmaine表示，學校安排學生上半日課，雖則可以讓學生分批回校上課和下課，避免人群聚集，但直言覺得「好無謂」，「返半日都冇用，平時一日都只係上5堂，（復課）之後上得一半又上唔到一半」，而且又指整個學期只剩個多月，學生現時上課亦很難追上之前的進度。不過，就讀中四的Teresa則持相反意見，認為上課半日雖然會增加感染武肺的風險，但總比留在家好，「吽喺屋企咁耐都會想返學，都會想見返啲朋友」，但她亦明言之前一直在家線上上課，現時復課對實際情況也沒有太大需要。

周女士的女兒就讀小六，她歡迎政府分階段復課的措施，「小朋友困喺屋企已經差唔多四個月，應該係逐步復課，對佢哋身心好啲，對家長都係好啲。」因為女兒小六即將升中，對她別具意義，復課起碼讓她回校與同學say goodbye，所以她也很想返學。但周女士同時亦擔心在校內會有病毒傳播，會吩咐女兒注意衞生。

從事旅遊業的陸先生得悉政府將放寬限聚令感到歡迎，但認為限聚令放寬至8人，根本沒有太大分別，「其實4人同8人都係冇乜分別啫，不如放寬晒好過啦，橫掂而家疫情都尚算可以控制到」。他又指中小學將分階段復課則認為沒有太大分別，「都係得返個幾月，一係將個暑假退返後啲，返番長少少都ok」，又認為學生返學上堂總比留在家中好，「面對面授課一定比網上上堂好」。

另外，從事設計業的陳小姐指由於政府不太可信，很多政策也處理不到，所以現時放寬限聚令，也覺得沒有太大分別，「我已經冇理會政府推出嘅新措施，就算係4人定8人都好，都冇乜太大影響」，但她則不建議取消限聚令，「雖然而家已經好多日冇人確診，但都唔可以鬆懈，因為傳染病只有一個人感染，就會有機會再次爆發」。她又指，政府應等到28日以上零確診才考慮復課，現時只維持十多日零確診，便宣佈中小學將分階段復課是「言之過早」。

記者　黎敬中

-----------------------------
App內1-Click訂閱《蘋果動新聞》
按此了解更多
-----------------------------
你敢爆，我敢獎！ 立即WhatsApp《蘋果》24小時爆相爆片熱線 或致電：63836568