「十優港姐」麥明詩(Louisa)同林作「冷靜」咗幾個月，最終都係分手收場。今日中午林作喺金鐘太古廣場出席一間咖啡店嘅開幕儀式，雖然係有問必答，但就答到大汗疊細汗咁，仲每個答案都答得非常小心。

活動完咗之後，林作就單拖去搭電車返公司，不過喺活動上答完大堆感情問題，似乎加重咗佢嘅疑心，好快就發現有記者一齊搭「叮叮車」，仲不時望向記者方向，似係想發泄不滿。林作只係坐咗兩個站就喺中環落車，然後直上新顯利大廈嘅寫字樓，睇嚟分手真係令佢好煩惱喎！