當年今日

我冇刻意賣性感

蘋果日報 2002/02/24 00:00


事業篇
莫文蔚出身書香世家,自幼在一個良好家庭中成長,在女拔萃讀中學時,品學兼優的她在參加校外的古箏、鋼琴、英文朗誦及舞蹈比賽時,均得到不少獎項,所以她在學校早已是一顆閃亮明星,令不少同學羨慕。
中學會考取得五優三良成績後,Karen在父母安排下到了意大利和英國讀書,精通英、法、中、意多國語文的她,選擇在娛樂圈發展的確曾令不少人感到奇怪。

自幼充滿表演慾
莫:其實我本身係一個好有表演慾嘅人,讀中學嗰陣已經係咁,好似我學唱歌、跳舞同唔同嘅樂器,我覺得對喺娛樂圈發展一樣好有幫助,而演戲同唱歌都係我好鍾意嘅興趣,當一個人可以每日做自己喜歡嘅工作,你話係咪好幸運?
記:你出第一張唱片時銷量唔係咁好,當時有冇打擊你入娛樂圈嘅信心?
莫:嗰陣我都未讀完書,咁唱片賣得唔好梗係會唔開心,當時我咪返英國繼續讀書囉!後來返嚟香港又有人搵我出唱片同拍戲,我當然唔會放過機會。

忙灌錄國語唱片
記:今年你轉投新力唱片公司,有人話新力要將你捧成一姐喎!
莫(大笑):呢啲我真係冇聽過,不過Sony的確係好支持我,最近我就係忙緊錄過檔後嘅第一張國語唱片,雖然𠵱家唱片市道好差,但對我嚟講,有難度反而更有挑戰性。
記:上一張唱片嘅封面你裸露背部,好多人都覺得好大膽,今次唱片你又會走乜嘢風格?
莫:其實我唔係一個好刻意去暴露嘅藝人,我覺得一切嚟得簡單同自然,就係最好嘅,所以有乜簡單過乜都唔着呢?當時因為有呢個概念,先會有咁大膽嘅嘗試,至於下張碟走乜風格,我想保持一啲神秘感。
遺憾未遇代表作
記:周潤發好欣賞你,認為你好有條件去荷李活發展,你自己有冇呢個準備?
莫:一路都有西片搵我拍,但重未遇到啱嘅。對於未來發展,我都係放眼國際性,將來如果有一部西片唔係因為要搵黃皮膚演員而搵我演出,相信我一定會樂於嘗試。
記:喺《食神》入面,你嘅醜女扮相好煞食,覺唔覺得呢部戲係你嘅代表作?
莫:《食神》雖然令好多人印象好深刻,但對我嚟講,暫時重未遇到一部代表作,希望喺將來可以遇到啦!

百變形象盡誘人
莫文蔚出道以來,向以玩形象見稱,可算是接了樂壇大姐大梅艷芳的棒。莫文蔚曾在電影《食神》中以極盡醜陋的造型示人,但在舞台上,莫文蔚卻異常性感,更曾以腳夾着劉德華跳舞,令華仔的fans嘩然。