今日唔少明星藝人趁農曆年出埠避年，令機場星光閃閃，甄子丹同老婆汪詩詩、賈曉晨（JJ）、童愛玲一家三口、陳家碧一家三口，仲有翁嘉穗兩公婆等，今日先後現身機場離境大堂。「宇宙最強」甄子丹同老婆汪詩詩拍拖現身，甄子丹仲著住條紅褲，好鬼搶眼，但未見仔女同行，原來甄子丹兩公婆撇低仔女，飛去新加坡過二人世界，認真浪漫。甄子丹仲話會玩幾日，之後佢就返香港拍戲，太太就繼續留喺嗰邊。

另外，同樊少皇愛得痴纏嘅JJ，就戴罩閃縮現身，佢話返鄉下過年，仲話男友都有同行，但現場有就唔見樊少皇，記者提議佢兩個合照，JJ就唔多願意兼耍手擰頭，佢仲爆咗句：「好大壓力。」拍拖咋喎，有乜壓力呢？