當年今日
關於我們

【話咁快入行11年】鍾舒漫開騷震撼眼球 要歌迷「曳啲」起身跳舞

蘋果日報 2018/12/18 10:00

鍾舒漫R U Naughty

鍾舒漫(Sherman)在樂壇輾轉起伏,入行初期曾經推出過幾首叫座歌曲唱到街知巷聞,惜聲勢最終力接不下,其後試過以不同類型曲風及造型繼續唱下去,至今成為香港樂壇另類風味,今年係佢入行十一年,終於達成心願於今日在麥花臣開騷,近日推出新歌配合舞台,特地打造party騷作好準備,面對人生夢想舞台,Sherman既緊張又想帶給大家驚喜之作,預告有種眼晴震撼感覺呈現觀眾眼前。
為配合個唱,Sherman年初至今推出連串快歌,早前為新歌《R U Naughty》拍MV,短短四日排舞完成拍攝,佢指跳舞時氣場要好chock,唔可以太嬌俏,Sherman話:「入行時第一首歌都係跳唱歌,想有貫穿感覺,首歌內容係叫人嚟開party,香港人睇演唱會好冷靜,外國同內地啲人都會企起身,香港偏內斂,所以專登推首歌叫大家唔使咁乖,有句歌詞『曳啲曳啲,唔係好知』,大家可以郁下唔好坐喺度。」
Sherman近兩年同公司有共識開騷,一切未落實之際竟有單位邀請,佢好興奮話:「始終人哋搵我哋,證明人哋望到啲嘢認為係時候做個騷,對我來講係鼓勵,唔同角度在於一個係我哋自己好想開,一個係人哋邀請我。」演唱會以party做主題,熱愛九十年代風格嘅Sherman會玩歌舞:「香港一貫演唱會去得多,我呢類型較少,可以講係我個年代冇見過,會有自己Sherman Style,玩Micheal Jackson、 Janet Jackson、Burno Mars嗰類感覺,有一節跳舞Solo,期待似外國片嗰種齊到你驚,希望有呢種眼晴震撼呈現到觀眾。」首個賣飛演唱會考驗實力,佢話:「未去到食唔安坐唔落,可能未到啦,暫時只開一場同觀眾打個招呼先。」對賣票成績點睇?Sherman話:「有壓力都冇用,做得咩?我哋呢個位最緊要做好自己崗位,各樣宣傳,啲人買唔買唔係我控製範圍。」
轉眼捱過十一個年頭,Sherman覺得眨下眼過去,雖然外表變化不大,但內心歷練與日俱增,佢話:「以前簡單冇乜經歷,十一年來經過好多掙扎同成長,問心無愧。」入行第三年Sherman獲得最好成績同迴響,一首《給自己的信》為她帶來多個獎項同殊榮,將佢事業推前,但最終未再突破反走下坡,未免有啲浪費,佢話:「細個啲都會諗係咪冇食住個勢,後繼、宣傳做得唔夠好,但一路成長冇咗呢個諗法,我信念中有佢Timing,嗰時出現嘅事為我成長係啱啱好,人哋睇到我跌咗食唔到個勢,呢啲都唔係我可控制到,冇得返轉頭去怪,何必介意呢。」
言談間感受到Sherman被時間啄磨出一份成熟感。經歷高低人之常情,Sherman一直冇灰心才走到今天實現夢想。入行十一年一直停留在英皇發展,Sherman同公司仲有兩年約,未諗轉變,佢話:「轉行冇諗過,只係中途做過小生意想試下並冇其他,公司完約前唔會有呢個諗法,我好清楚台上唱歌係我好鍾意,唔會咁快完結。」
至於感情生活方面,Sherman等緊緣份出現,佢話:「隨遇而安,有個心態我the one一定喺左近,唔會好耐先出現,我open態度,反而我媽媽心急啲,之前我去英國短宣去教會分享,出發時叫我去到當地物色下男仔,結識人溝通下,從來未聽過爸爸媽媽咁講過,搞到我好似好危險咁,我仲好老定。」
採訪:卓寶花
攝影:陳慧安
DV片段:馮嘉銘
精選娛聞,喺晒《娛果》
http://fb.com/appledailyent
empty
鍾舒漫入行十一年,終於達成心願於在麥花臣開騷。
empty
佢話香港歌迷偏內斂,睇騷好少會企喺身。
empty
Sherman年初至今推出連串快歌,佢話想同出道時形象呼應。
empty
呢次演唱會目標只得一個:希望有呢種眼晴震撼呈現到觀眾。
empty
《給自己的信》為佢帶嚟事業高峰,成長咗嘅Sherman話何必要望番轉頭。