郎朗噚晚喺紅館舉行一場《郎朗LiveinHongKong》，並邀得好友李克勤與容祖兒擔任嘉賓，身穿透視裝嘅祖兒先喺郎朗伴奏下獻唱一曲《搜神記》，跟住就同克勤合唱《世界真細小》，本來獨唱時淡定靚聲嘅祖兒，去到合唱時竟然發台瘟唱錯歌詞，佢即時尷尬掩口笑，身邊嘅克勤嘅驚訝碌大隻眼望一望祖兒，然後行開少少繼續唱，而大師級嘅郎朗當然係繼續彈。

獻唱完後，郎朗即拎出一支自拍神棍話要同克勤、祖兒自拍，克勤以國語說：「如果要拍就轉過這邊。」跟住又突然醒起用廣東話講：「講咩國語，講廣東話，大家（觀眾）想影到，就補補妝同V。」

郎朗大讚兩人唱得很美，令佢個心也快碎掉，克勤就直問祖兒剛才為何要笑，祖兒就話：「因為我唱錯歌詞。」不過郎朗指聽得好舒服，克勤笑住話：「你真係好識講嘢。」祖兒再解釋話「好緊張呀，大佬。」克勤就反問佢仲乜咁粗魯講嘅，祖兒望住克勤指：「咁你係我大佬。」

郎朗受訪時好感激克勤同祖兒到來擔任嘉賓，對於祖兒唱錯歌詞，郎朗指只聽到祖兒笑，但三人合作感覺好似談三角戀，佢話:「為他們彈奏情歌，我一時望著克勤，一時望著祖兒，有錯三角戀感覺。」

於紅館演奏，郎朗表示特意挑選多元化曲目，將來再嚟紅館時，最重要都係要揀選唔同曲目，俾大家唔一樣感覺，而今次邀請來指揮家俞潞，郎朗指是新一代指揮家，佢希望給予更多機會新一代，正如encore位時邀請一位香港鋼琴演奏小朋友上台合奏，一新觀眾耳目。