任賢齊同謝安琪（Kay）今朝一早以大使身份到青衣參加「單車百萬行」啟動禮，由於兩人都需要分別趕往參與另外兩個慈善活動，所以未能落場參予。不過，小齊就大讚港人善心爆棚，又熱愛戶外活動，所以近來越來越多相關活動舉行。

阿Kay過去兩屆因為生B而缺席，今年得知參加者年齡已降低，佢計劃明年帶大仔張瞻一齊參加，小齊亦希望香港政府可以增設多些踩單車設施同空廣地方，讓小朋友可以安全情況下踩單車。

嚟緊23號係阿Kay細女張靖一歲生日，阿Kay笑指愛女希望一歲時能夠見到契爺麥浚龍，因為契爺最近忙拍戲，完全冇時間見契女，問阿Kay可會開生日會慶祝？阿Kay話：「會搞個小型，同佢約幾個朋友仔慶祝，之前帶咗佢去參加阿公（蘇永康）同車婉婉兩位小朋友生日會，見佢都好識同人玩，社交能力好好。」

身邊小齊笑指自己仔女已大，已經有自己朋友圈，問到小齊可有留意12歲大女Rati拍拖未？佢笑笑口話：「仲未，再過一陣就要開始擔心。」

精選娛聞，喺晒《娛果》
http://fb.com/appledailyent