當年今日
關於我們

地產多聲道:太古盤前哨戰代理先鬥攀石

蘋果日報 2003/08/20 08:00


中原、美聯同利嘉閣鬥賣新盤就試得多,噚日嚟個大突破,喺太古城中心商場舉辦攀石比賽。三間行都相當重視呢次比賽,連服裝都精心設計,有迷彩褲、頭巾同T恤。
每隊派出四人參賽,時間最快嗰隊算贏。出賽嘅都係以猛男為主,只得兩位女將,不過女孩子身手靈活,攀石絕不輸蝕。結果由中原三男一女嘅組合,以一秒之差險勝,輸咗嘅兩間代理行,要夾錢請大家食午飯。
今次活動,主要係太古逸樺園開盤前嘅前哨戰,所以人人有獎,永不落空。美聯憑住佢哋設計精美嘅樓盤Logo衫贏咗個最具創意獎,而利嘉閣奪得最佳體育精神獎。
攀石比賽只係前奏,埋身肉搏戰會喺九月賣樓時先至正式展開,三間公司到時再決勝負。

26呎水晶吊燈率先入伙
西九龍新樓陸續入伙,早前有大角嘴港灣豪庭一期,同區凱帆軒,今年十月入伙。長實開始為耗資四十萬元興建嘅樓盤會所裝身。一直放喺售樓處嘅二十六呎水晶吊燈,會搬過去屋苑會所。長實噚日搞咗個拆卸水晶燈儀式,相當隆重。
屋苑會所裏面,有三千呎地方可以畀住客開派對,視聽室嘅設備,部份由高級營業經理黃思聰介紹買嘅。聽呢位音響發燒友講,淨係套音響器材都要成二十幾三十萬銀,算係中高檔貨色。
自由行帶挈商廈租務旺
搞本地遊嘅公司,可謂食正自由行個旺勢,有專辦國內人士嚟港旅遊公司,啱啱掃貨,先後購入尖沙嘴兩幢甲級寫字樓單位,一作投資,一作自用。分別購入力寶太陽廣場二千一百呎寫字樓,每呎二千八百元,另一個好時中心一千呎單位,作價一百八十八萬。
中原商業部總經理鄭繼標話,廣東省自由行落實,尖沙嘴商廈成交也受帶動,年內租務料會升一成半,但租金只會企穩。

駿景園換樓對象
火炭駿景園曾經係區內豪宅屋苑之首,能夠入住,係身份象徵,但𠵱家樓價跌到屋苑價。
聽美聯鄭文偉講,過去半年,駿景園每月得十宗八宗成交,最旺市嘅六月,都只係得十二宗,但今個月上旬已經十二宗,集中千一、二呎單位,而且好多都係沙田友細屋換大屋。
呢班沙田友住緊層樓都已經供完或者就快供完,趁樓價跌咗咁多,決定換大屋,住得舒服啲。不過,佢哋還價好審慎,呎價超過三千蚊,就會打退堂鼓。
蘭西
電郵地址:[email protected]