關楚耀（Kelvin）、何佩瑜（Jeana）等噚晚去圓方出席《爆3俏嬌娃》首映，佢話見到緋聞女友周秀娜最近不斷拍戲，好期待娜姐瞓身演出，覺得娜姐落咗好多苦功，作為演員十分專業，仲講笑話希望快啲出DVD可以睇，咁出DVD係唔係可以定格睇，佢就話希望可以睇3D版。

講到娜姐嚟緊會包場睇戲，但關楚耀就無意參加，又話娜姐有好多朋友，原本娜姐會同爸爸媽媽一齊嚟，可以見吓家長，關楚耀就話：「有啲咁嘅事？我本來都想叫阿爸阿媽嚟睇。」

噚日娜姐喺活動上表示，要求將來另一半要識煮嘢食，關楚耀即話： 「我都識煮，我有自己烹飪節目，亦會開一啲飲食節目，會親自煮餸，咁睇下佢得唔得閒，不過佢食齋。」

Jeana對於老友陳靜（DaDa）被傳收100萬追數令，佢愕然話：「吓，點解？唔清楚，不過我覺得件事發生咗，唔可以分好與壞，每個人都有起跌。」至於會唔會向錢國偉美言幾句，佢就話大家見面都唔會講呢啲，佢話：「都係講部戲，一來唔關事，二來件事都過咗氣。」

問到會唔會喺經濟方面支持DaDa，佢就話自己也撐起成頭家，如果有能力都會幫朋友。