喺今年4月生咗囡囡Giselle嘅吳若希，生咗女冇耐，有朋友喺ig擺咗張Giselle嘅正面相，結果惹到一地負評，護女心切嘅吳若希，公開鬧爆友人「屎忽生上腦」、「我冇呢啲onX朋友」(新聞連結： http://bit.ly/2qGMy6t )。點知轉個頭佢又再喺fb同Instagram分別與多位網民爆「罵戰」，留言涉人身攻擊，最後吳若希好嬲咁回覆：「我發誓！如果我有，我個女即刻死」、「你老母生你出嚟好悲哀」。(新聞連結： http://bit.ly/2xuUmhj )

不過狙擊事似乎未有停過。每個新手媽媽都鍾意喺網上貼bb相，吳若希都唔例外，話說因為佢喺ig貼咗張抱囡相，網民留言問囡囡有冇爸爸，嗰陣吳若希已經爆粗還擊：「Onxx！無爸爸點出世？你條女知唔知你把口咁臭？」

結果吳若希瞓身護女，忍無可忍嘅情況下，將呢個網民起底，連出6個post，公開該網民ig，包括樣同名。吳若希喺第一個post話：「你想出名唔通唔幫你咩？叻~!一而再而三挑引(釁)我，做乜姐你？講咗幾次唔好攞我個女嚟玩，你係咪有病姐？鬧你咪鬧你囉使俾面你？」

及後該網民即private咗個ig，吳若希即又出post，今次係該名網名大頭相。吳若希問佢點解要set private，又謂：「做乜delete 留言姐？」到第三個post，吳若希連對方女友合照都出埋，並問；「無啦啦俾人追(狙)擊係咪好好玩？」未幾再出post問：「純粹問一句，我也是人，你有沒有想過如果這種欺凌事是發生在你自己身上，你是甚麼想法？」

發完火嘅吳若希，喺第6個post，亦即係最後一個，留言話：「好啦～ 我玩完啦！你嘅世界真係好唔公平，所以你要將唔公平發洩喺人哋身上～ 我都好多謝你～等我發現呢個世界原來對我好公平～因為雖然有你呢啲人，但我身邊都有好多對我好好嘅人！」最後，吳若希將之前啲起底post刪晒，佢話刪post唔係退讓，希望大家識得尊重大家，事件亦應該要告一段落！

唔少網民睇完之後加入討論行列，有人撐佢做得啱，但亦有人覺得佢唔需要同人對罵，索性block咗對方嘅留言！