智能售賣機出現咗好幾年，但香港近年先叫做開始興起。有人以租售售賣機賺錢，亦有人以加盟模式，透過售賣機賣產品同廣告拓展商機。成功個案好似好多，但呢門生意亦有其風險。香港嘅智能售賣機，將來能唔能夠好似日本咁盛行，仍然係未知之數，但以下三點值得投資者注意。

1. 售賣機對租借地點嘅影響
現時大多數售賣機位置位於商場、屋苑、學校內等等，但暫時好多商場等嘅租務代理 ，對售賣機嘅潛力、成效、以至對其他租戶嘅正面 / 負面影響，都未有好深入嘅了解。所以大多租務代理都係以小試牛刀嘅心態去處理，租金上可能仍然保守，批出嘅地點亦未必係「靚位」，人流可能較少，影響廣告收益。當市場了解加深後，售賣機喺租借嘅地點同租金都可能會遇上唔少嘅掣肘，同時亦會大大影響其回報能力。

2. 消費者接受程度
香港人對新事物嘅接受程度一向比其他國家嘅人低，由最初嘅e-payment、e-banking、mobile banking等等，都相對地遲起步。如果要售賣機做到好似日本成行成市，相信香港嘅消費者要較長嘅時間接受呢種銷售模式。另一方面，香港人喺消費上嘅要求非常高，亦因為咁而養成「投訴文化」。所以香港人透過數碼平台購物時，除非係較便宜嘅貨品或者有退款服務，如果唔係，香港消費者對一部無人售賣機上嘅產品，都會抱有一定戒心，所以產品嘅銷售額未必一如理想。

3. 銷售點飽和
香港地方細，可以放置智能售賣機嘅地點亦有限，供求有限除咗影響租金上升之外，飽和嘅情況相比起日本亦會較快。現時香港較為有規模嘅智能售賣機公司約有3-5間，細公司更多不勝數，有公司更估計2018年售賣機數量可多達1000部，照估計嚟緊全港所有售賣機數量總共大約有2000至4000部甚至更多，「靚位」有限，但售賣機數量不斷上升，未來一、兩年可能好快飽和。

投資創業，「危」「機」永遠都係並存，搵到商機時亦要注意其「傷」機，能夠平衡兩者先係賺錢之道。

專欄作者簡介：
我做Marketing
由Michael及Derek兩位marketer創立的媽劇停平台。撰寫市場及職場文章。著有《我做媽劇停》及《暖男之道》。

Facebook專頁：
https://www.facebook.com/iDoMarketingHK/