由金像影后珍妮花羅倫絲（JenniferLawrence）主演嘅《飢餓遊戲2：星火燎原》（TheHungerGames：CatchingFire）噚晚喺倫敦舉行首映禮，青春無敵嘅珍妮花着咗件露背裝現身，加埋清爽短髮，成個感覺相當型。不過佢都係好百厭，喺首映禮係咁搞搞陣，又夾埋男角廉安咸士禾夫（LiamHemsworth）整蠱男主角祖舒夏捷臣（JoshHutcherson）。之後珍妮花同班女演員合照嗰陣，又掩住扮佢個妹嘅女星WillowShield塊面。

另外，同場搶鏡嘅仲有伊莉莎伯班絲（ElizabethBanks），佢嗰條黃色晚裝好sharp，仲露埋事業線。有個影迷扮咗伊莉莎伯喺戲入面個造型去捧場，成功吸引到伊莉莎伯行埋佢合照。