有線電視有新買家注資，有機會繼續營運，其實馬迷對有線賽馬18台嘅口碑一直唔錯，唔同馬會官方製作嘅賽馬節目，有線嘅賽馬節目係自家製作，主持嘅言論相對直接大膽，睇到賽事中有乜嘢肉酸礙眼鏡頭，絕對夠膽講夠膽鬧，若然18台因為電視台倒閉解散，確係可惜。

馬會官方賽馬節目，近年畀公眾嘅感覺係唔好睇同唔想睇，唔少馬迷覺得班主持欲言又止、就住就住，就算賽事有啲離晒大譜嘅跑法，主持都唔敢講咁多，好多時模稜兩可輕輕帶過，更差嘅係經常有唔少擦擦傍傍嘅評論，立場完全側晒喺馬會嗰邊，公眾梗係越聽越谷氣。

平心而論，主持言論拘謹係官方賽馬節目嘅死症，話晒一眾評馬主持都打緊馬會工，今時今日賽馬傳媒行頭越嚟越窄，無論係本地賽事節目，抑或越洋賽事嘅賽前節目或直播，都係評馬人嘅收入來源，人人都要顧住個飯碗，萬一因講嘢過火，得罪人冇得撈就大件事，或者馬迷私下都會諒解主持嘅難處，但對節目嘅劣評就唔會改變。

無可否認，有線嘅賽馬節目係做得唔錯，即使未必人人啱口味，但如果能夠維持落去，喺馬會官方賽馬節目以外，有多一個企喺公眾馬迷立場發聲嘅電視頻道畀馬迷選擇，始終都係好事。家陣電台播馬已冇得揀，希望唔好連電視睇馬都冇得揀，變獨沽一味。

阿Joe