今個禮拜日東方同冠忠南區喺香港大球場，爭奪今個球季首個本土頂級盃賽錦標高級組銀牌，決賽對壘當然值得球迷期待，而足總賽前亦會搞番個記者會，幫呢場波造吓勢，希望到時有更多球迷入場睇波。大家都會留意到嘅係，東方「牛丸」陳婉婷有冇機會以女主帥身份，領軍贏盃賽呢？之不過，佢哋對手南區，教練係曾經出任傑志助教嘅鄭兆聰。

「牛丸」再遇「聰仔」，球迷好自然諗到2012年發生嘅「胸」人事件，當時場足總盃決賽，聰仔「胸」撞時任飛馬總教練陳曉明同行政主任「牛丸」，結果聰仔就俾網民話打女人咁嚴重。當年聰仔事後接受我哋訪問，已向「牛丸」道歉，仲原諒咗佢添，但聰仔最後俾足總判停賽六場。事隔三年半有多，兩人再遇身份唔同晒，「升呢」做南區同東方主教練，今次又喺決賽爭盃，睇嚟聰仔喺賽前記者會，避唔開「胸」人事件舊話重提囉。

講到「牛丸」陳婉婷，早前佢接受咗大台節目做專訪，節目今日下畫就出咗街，如果粉絲想睇番嘅，夜晚同網上都有重播嘅。

當年「胸」人事件報道↓↓↓
http://bit.ly/23bMeef

體蘋果facebook專頁↓↓↓
http://fb.com/appledailysports