即使有演藝界及電影界11大屬會聯署要求代表業界嘅立法會議員馬逢國辭職，但馬逢國反指業界有200多個單位及屬會，暗示11屬會只屬少數意見，又指只曾收過該11屬會一個SMS，表示希望佢喺特權法議案上投贊成票，但同時馬逢國又強調自己多次同業界接觸收集意見。換言之，結論都係11屬會意見少數。

香港導演協會榮譽會長張同祖今日接受本報訪問時，表示馬逢國嘅表現，就可以令大家明白功能組別選舉制度之惡劣，佢話:「成個影視界有咁多人，但體育、演藝、文化及出版界組別選舉立法會議員，只有一票投票權，馬逢國先至會唔聽取真正業界聲音，所以首先應該推翻咁唔公平嘅功能組別選舉制度。」

至於香港電影製作行政人員協會發言人田啟文（田雞），接受本報訪問時就話：「影視界已表達咗我哋嘅不滿，如果佢認為係小眾聲音，咁唔該佢公佈有乜屬會叫佢投反對票。既然佢聲言唔辭職，咁我哋業界會再開會商討下一步行動。」