其實由反送中至今，好多捐款者已不滿無國界醫生唔見人，佢哋噚日份聲明又講到要保持醫療中立、又成立評估小組，認為香港醫療資源同救援能力充足，又唔係對香港情況漠不關心，但要根據評估結果作救援決定，結果再辣着網民，洗版式狂鬧咁多個月前線醫護係咁中彈，咁都唔叫人道危機？咁都要評估咁官僚？而且人道立場而言，並冇中立，只有救同唔救，於是成班網民立即發動cut捐款。
不過有網民話cut捐款唔易，個熱線根本打唔通，有人更嬲到直情cut信用卡，等捐款過唔到數，搞到無國界醫生要澄清冇阻人cut捐款，只係線路繁忙，到下午就有4個着「無國界醫生」T恤嘅人去理大，話去觀察情況，唔怪得有網民話cut捐款有效，一講到錢，評估立即唔同晒！