西灣河嘉亨灣，名人買家特別多，除咗老牌投資者，年輕一輩都有捧場客，樂隊Shine成員黃又南，噚日凌晨時分買咗間。
美聯曾志光話，又南買入六座三十樓以上G室，六百七呎，逾三百八萬，每呎五千七。又南話未諗掂自住定投資。不過，佢用建築期付款，睇怕都係投資居多。又南𠵱家先至話二十歲出頭，舊年有七位數字收入，真係錢途無限。
另外，恒基噚日揀灣仔君悅酒店，做嘉亨灣第二輪內購，而喺等候區，亦好細心準備好多美食招待準買家。賣樓流程雖然比第一次快好多，買家都有時候享用美點。恒基話有鮑魚款待，不過蘭西無緣享用，因為鮑魚受歡迎，做咗快閃黨。

上海交樓增值
香港公司北上拓商機已成為大趨勢，唔少重將本港模式引入內地，好似新昌管理，佢哋攞到瑞安上海瑞虹新城二期管理合約，樓盤交樓時，安排交樓大使喺大堂接待，陪同辦理有關手續，同齊齊去驗收單位，即時解答業主問題。
據聞，部份本港物業管理公司，管理嘅內地住宅，都有提供類似服務。
新昌管理喺內地嘅管理業務，𠵱家主要集中喺上海同北京。