香港榮華餅家就「榮華月餅」註冊商標擾攘10幾年嘅訴訟有發落，東莞市中級法院判決佛山市順德區蘇氏榮華食品有限公司敗訴，要向香港榮華同內地合作公司東莞榮華餅家，賠償商標侵權經濟損失20萬人民幣。

消費者向正牌投訴

香港榮華發言人對勝訴非常開心，法官判詞以「知名商品的特有名稱」為依據，指香港榮華多年嚟喺內地做咗好多宣傳同銷售，一般公眾已將「榮華月餅」四個字等同為「香港榮華」，所以日後其他公司再用「榮華月餅」都屬侵權。
「順德榮華」月餅盒包裝、裝潢同香港榮華似足九成，最大分別係左下角多咗個圓形簡體字榮華商標。香港榮華發言人話，內地有數之不盡嘅偽冒包裝，有啲仲抄到十足十，連香港榮華職員同經銷商都分辨唔到，所以今次判決對其他處理中嘅侵權訴訟好有幫助。
發言人又話唔少消費者喺不知情下買咗冒牌榮華月餅，向正牌投訴品質唔掂，希望今次判決可以保障消費者同公司。