目前正當兵嘅韓國天團BIGBANG成員T.O.P，今日驚爆曾吸食大麻而接受警方調查，T.O.P所屬嘅YG事務所亦承認事件，表示T.O.P正深刻反省中，隨後韓國方面越爆越多內幕。

據報道指，警方調查時發現T.O.P於去年10月9號至12號喺自己位於首爾龍山區嘅寓所內涉吸食大麻，前後共三次，同場仲有一名約21歲嘅女性練習生，隨後T.O.P需要接受小便及毛髮檢驗。報道又指T.O.P受查時曾講大話表示自己冇吸食大麻，只係吸食電子煙，不過毛髮檢驗結果對大麻呈陽性反應，證明T.O.P的確有吸食大麻，所以於4月尾時將案件送檢。

T.O.P正在服兵役嘅首爾地方員警廳宣傳部門透露，T.O.P喺上個月30日外出休假，將於明日傍晚返回服役單位，佢哋會根據檢察院調查結果先對決定採取乜處罰。據知如果檢方決定起訴T.O.P，而經過裁判後T.O.P被判處一年半以上刑罰的話，T.O.P需要立即退伍，之後先再繼續服兵役；假如刑罰唔超過1年半，T.O.P就可以繼續服兵役。