為宣揚身心健康，李佳芯（Ali）今早喺山頂出席活動，與十多位粉絲一齊行山，期間大會特別頒贈「最佳女主角」模型獎座畀佢，預祝Ali喺即將舉行嘅台慶頒獎禮旗開得勝奪「視后」，令Ali好驚喜。

提到行山，李佳芯表示自入行後經常行山：「今日呢個行山活動好有意義，畀人了解情緒健康嘅重要性，我好認同，因為我每次見到大片天、大片海，感覺就會冇晒煩腦，大自然接觸嘅喜悅係凌駕一切辛苦。以前我會騎馬、潛水、攀石，但呢幾年入咗行冇咁多時間去騎馬，所以多咗行山。」問到行山辛唔辛苦？佢話：「鍾意就唔會覺得辛苦，但我都怕曬，唯有搽多啲防曬。」

娛樂圈工作忙碌，難免生活壓力較大，李佳芯亦透露試過拍喊戲之後，情緒低落，難以抽離，佢話：「其實都過咗壓力最大嘅時候，入行頭幾年壓力最大，因為我本身對自己要求好高，而且又唔知點釋放負面情緒，搞到啲皮膚、健康、精神都好差，所以我會去正視呢個問題。」台慶頒獎禮舉行在即，未知被喻為「視后」大熱之一嘅佢有冇壓力？Ali話：「現在未算最大壓力，通常都係要坐喺台嗰刻先緊張。」

精選娛聞，喺晒《娛果》
http://fb.com/appledailyent