英超球員喺聖誕節雖則冇假放，但利物浦有個傳統，就係每年都會搞聖誕化妝派對，仲要係有主題嗰隻；聽講佢哋今年嘅主題係80年代流行歌手，古積特應該會扮佐治童子（BoyGeorge），實行做DirkGeorge㖭。
記得利記舊年個聖誕派對嘅主題係電影人物，班球員扮鬼扮馬，其中芬蘭後衞希比亞、英格蘭後衞加歷查、荷蘭前鋒古積特同已經離隊、轉投西甲皇家馬德里嘅波蘭門將杜廸克，就分別扮黑俠梭羅、蜘蛛俠、超人同埋黑武士。

賓尼廸斯昅住咪亂嚟

今年利記個聖誕派對主題係80年代流行歌手，聽講古積特已經諗好扮乜，就係當年仲未有大肚腩同髮線後退嘅佐治童子。利記內部啲人話：「班球員個個都好認真，務求以最突出嘅扮相出席聖誕派對。聽講古積特已經諗好咗，嗰日佢會扮個camcam哋嘅歌手，不外乎係佐治童子或者AdamAnt。雖則同佢喺球場上嘅形象完全係兩樣嘢，但就好令人期待。」
英超喺聖誕同新年期間開快車，利記有個聖誕派對畀球員鬆鬆，其實係件好事。但玩還玩，千祈咪過火，事關早幾年前，加歷查就斗膽叫啲脫衣舞女郎嚟助興，仲要俾英國啲小報影到，從而大做文章，搞到利記鬼死咁尷尬同冇晒面。之但係咁，佢哋領隊賓尼廸斯向來紀律嚴，之前嚟香港都唔畀班球員夜蒲，加上佢同老闆啲關係咁差，為免受靶，睇嚟佢會昅實班球員。