中港家庭權益會出哂新聞稿，話明噚日朝早11點去中聯辦示威，要求約見中聯辦主任彭清華傾單非問題，十幾個警員一早擺好鐵馬陣迎接示威者，點知警察同埋記者喺烈日下暴曬20分鐘，仲未見到權益會代表，連警察都忍唔住問記者，「究竟示威者去咗邊？」八方覺得唔尋常，示威者一向有早到冇遲到，唔通示威者集體「被失蹤」？
八方於是主動聯絡中港家庭權益會組織者曾冠榮，佢話「發生咗事，示威取消咗。」稍後再公佈幾時示威。成班行家知道消息後呆晒，出咗新聞稿講好嚟中聯辦示威，竟然冇通知自行取消，唔通有人被中聯辦和諧咗？出咗乜事咁神秘呢！