上季贏52場排第三位的田泰安，開鑼戰只得一亞一季，反而南非新人利敬國起孖搶盡鋒頭。今期夜賽田泰安騎七駒，但普遍座騎的實力未算突出，惟獨第四場何廄「艦長天下」最具勝望，開齋有本錢。

第四場四班1200米，「艦長天下」上仗跑同程排12檔起步，前中段居包尾位置，直路從內疊發力衝刺，狂追六個馬位，但終點前仍是姍姍來遲，輸四分三馬位僅跑獲季軍，走勢卻明顯有超班馬的風範，能力肯定高過同父馬「阿凡達」，質素至少值三班尾，目前僅48分好着數。

呢匹四歲愛爾蘭自購馬近期進度漸入佳境，8月24日試1200米泥閘，末段追勢悅目，狀態更勝上回，今場排三檔形勢好，買Q做膽信得過。

「麯院風荷」當年由蘇偉賢替馬主購入，據聞身價超過六百萬港元，至今在港贏過三場三班賽，累積429萬獎金，馬主實際落袋的獎金，仍未夠馬價的一半。此駒上季冇贏，減掉25分，目前52分乃在港新低，七歲愛爾蘭馬實力未盡退化，今季可望反彈贏一、兩場。

「活力寶駒」與同主馬「喜寶駒」及「愛寶駒」一樣，乃著名馬販派斯的出品，此貨源盛產早熟馬，普遍來港後頭三場已有好表現，否則質素亦難寄厚望，此駒今仗是第四次上陣，需要跟進。「紫雲星」降班兼用黃俊減十磅有利，快放可爭一席。