阿仙奴近期陷入低潮，領隊雲格嘅去留又成為網民熱話，唔理佢戰術呆板好，臨場調動慢又好，但有一樣嘢雲爺爺敢認第二，都冇邊位領隊敢認第一，就係佢賞識「幼齒」嘅眼光。

唔到你唔信，雲爺爺早幾日先讚完摩納哥前鋒基利安洛天（Kylian Mbappé Lottin）係「新亨利」，呢位18歲前鋒喺法甲周二快車作客蒙彼利埃，21分鐘就接應隊友直線妙傳，速度完爆對手後衛，最終冷靜單刀建功，射入個人今屆聯賽第四球，幫球隊贏2:1，賽後24戰得55分繼續排榜首，領先同日主場2:1贏里爾嘅巴黎聖日耳門三分。連埋香港時間今晚深夜先主場火併聖伊天嘅奇兵尼斯，法甲「三頭馬車」睇嚟有排鬥！