自從舊年藥檢肥佬被罰停賽15個月後，俄羅斯靚女網球手舒拉寶娃已經飛抵德國，準備下周刑滿後復出征戰斯圖加特網球賽，呢日佢喺社交網站上載一張喺木製天花嘅泥地場練習嘅相，睇嚟好期待再次同球迷見面。不過，到底法網賽會應否發外卡畀佢參賽，就繼續成為爭論焦點，今次輪到波蘭球手拉雲絲卡出聲，表示舒娃應該靠自己爭取好成績從而重返大滿貫：「呢種外卡方式只應該適用喺因為傷病或者其他突發事故導致排名下跌嘅球手，唔應該包括服用禁藥。佢仲未獲得法網同溫網邀請參賽，而我覺得應該維持呢個狀況，佢應該以好成績贏得參賽資格。」賽會就表示將會喺法網舉行前兩星期、即係5月15日前後決定。

對於唔少球手口誅筆伐，舒娃經理人艾森布特（Max Eisenbud）終於忍唔住要爆，特別點名批評拉雲絲卡同禾絲妮雅琪為咗喺嚟緊缺少多位勁敵嘅大滿貫捧盃，先至連環發言唔想舒娃參賽喎：「好似拉雲絲卡同禾絲妮雅琪嗰啲從來未贏過大滿貫、又俾新一代球手蓋過嘅journeymen，佢哋好聰明，嘗試唔畀舒娃打法網。冇莎蓮娜冇舒娃，冇艾莎倫嘉冇姬維杜娃，呢個係佢哋最後一次贏大滿貫嘅機會。」呢位經理人咁寸，對舒娃又有甚麼好處呢？