吳孟達今日到馬場出席活動，講到聽晚佢有份主演嘅劇集《他來自江湖》重播，達哥都好期待話:「好經典，成26年前，以當時係超水準，又好收視，依家晚上12點幾啲戲好受歡迎。」不過達哥因身體狀況要早休息，所以唔會追劇，平時打開電視只係睇新聞、馬同波。

講到拍劇合作，達哥仍然記憶猶新話：「我同星仔都係二、三線演員，我就資深二、三線，有時我哋度咗啲嘢，冇人敢講就我去搵監製提出，當時好多監製又同星仔唔熟。」達哥話去年星仔開拍《美人魚》時有透過中間人聯絡，但最終無緣合作。

問到達哥係咪如今劇集新不如舊?達哥即話：「唔好咁講，好睇，只不過我冇睇啫。」會否期待《他》劇出街後，有效應更多人搵佢工作搵多轉快錢?達哥話：「一直都好多人搵我做嘢，內地多，事實近年內地劇好過香港同台灣，文化水準高，對中國文學有研究，呢個唔係我講，相信大家有目共睹。」