一共六場嘅「草蜢BeThree演唱會」，噚晚已經係第五場演出，呢次請嚟嘅嘉賓，分別有人妻謝安琪（Kay）及古巨基，Kay喺台上自言聽見被草蜢邀請做嘉賓，即刻仆到嚟，而基仔則爆料笑指傑仔唱K其實為食魚蛋粉，阿智最愛品嚐歷史悠久嘅提子汁，至於蘇老闆則是生意王。

草蜢第五場演出繼續勁唱勁跳，並獲不少圈中朋友撐場，包括錢嘉樂、黃翠如、湯寶如及尹子維等，噚晚表演嘉賓則有人妻Kay及古巨基。傑仔與謝安琪合唱《愛一次便夠》，阿智在台上多謝Kay來擔任嘉賓，Kay笑說：「我係仆到嚟！」

阿智又大讚Kay係女靚聲，Kay笑謂佢媽咪都買咗螢光棒嚟捧場，可見媽咪十分尊重呢個演唱會，因為媽咪連佢嘅演唱會都唔會買螢光棒，Kay表演完後，更走到觀眾席繼續睇騷。

另一位表演嘉賓基仔出場時，被草蜢介紹係人靚聲甜，基仔即笑說：「唔係啩。」

阿智又叫現場觀眾大呼靚仔基，基仔笑言有靚仔傑喺度，佢實在唔敢認靚仔。基仔又表示其實佢患上感冒，所以唔敢企埋草蜢身邊，佢哋合唱《友共情》，基仔又獨唱《愛與誠》。

基仔喺台上大談與草蜢溝通方法及笑料，佢笑稱：「我哋識咗一段時間，我哋每個溝通方法都唔同，有次我同蘇老闆通宵傾電話，係問啲生意上問題嘅意見。」

基仔又爆阿智時常教佢飲提子汁，而且係1989年嘅提子汁更好飲，在旁嘅蘇老闆扮發音不正笑言，每日一小杯（悲）好健康，最後基仔笑言：「有一晚傑仔帶我去唱K，不過去到唔係唱K，傑仔話呢度啲魚蛋粉最好食。」令現場觀眾都忍唔住笑。