是日新亞視開台記招，最備受矚目肯定就係前無綫總經理陳志雲今次出手撐亞視，仲主持新版《百萬富翁》。之前王喜已經爆料話陳志雲為咗主持節目而買咗好多套西裝，今日記招上亦大派用場。

陳志雲打晒bow tie，官仔骨骨現身，令司儀曾華倩都忍唔住摸一摸佢胸膛，陳志雲都冇「反抗」，只係笑笑口話:「胸膛可以掃，其他地方就唔好喇。」臨走前華倩又抽多次水，話志雲咁靚仔可唔可以錫番啖，於是又錫錫面珠先放佢走。

曾華倩問志雲大師今次「係咪好Free」？陳志雲答:「係呀，我好free呀，乜嘢都講得，你係咪想問我官司呀？不過已經完結咗喇喎!」仲「反客為主」同華倩講:「我對你啲秘史都好熟㗎，能夠念得三番四遍㗎!」

至於獎金今次預咗幾多呢？陳志雲又有骨落地笑言:「高層今次唔使攞個篋出嚟喇，6,500萬嘅現金亦都準備好，你哋有本事就嚟攞走100萬啦。」

華倩問:「咁我屋企人同亞視員工參唔參加得㗎？」志雲就話:「我做人公開公正，透明度高，你又同我冇親戚關係，可以參加。」又建議大家可以用三個錦囊就可以運籌帷幄。

另外，曾經因為被志雲喺大台叮走嘅梁思浩（新聞連結： http://bit.ly/2CzoEiS ），見佢今日就算同志雲同場，但似抗拒合照，梁思浩就話：「我諗我冇抗拒，我見佢唔到，可能我今日比較好運，所以見唔到。（係咪仲嬲佢？）嬲唔嬲我諗就……當年佢炒我件事我諗我放低咗㗎喇，盡量唔好見啦！」問到如果亞視搞綽頭、叫佢哋合作做節目會唔會介意？梁思浩話：「咁我要重新考慮一次合唔合作，（出動銀彈會唔會打動到你？）有啲嘢叫傲骨嘅，唔係俾錢就得，暫時嚟講應該唔會有合作嘅空間。我係好坦白嘅人嚟嘅，唔合作就係唔合作！」再問到佢喺亞視會做咩節目，佢就話會主持一個娛樂講真說話嘅節目，仲話其實過往喺另一啲電視台都做過，但好收得，佢話自己會將個節目發光發熱，所以好有信心收視爆燈。

更多娛聞，喺晒《娛果》
http://fb.com/appledailyent