蔡國威接受《蘋果》電話訪問時，就說:「其實我覺得係意料中事，由今日法院判決話唔干預臨時清盤人任何動作嘅時候，我就覺得德勤係一定會做遣散。」

「一直之前佢(德勤)已經做緊呢樣嘢，而係佢哋專業角度睇，佢哋咁pro，做開清盤，冇資金營運同真憑實據，佢聽日遺散同清盤呢個動作，係一個真正嘅解脫，畀員工一個清晰嘅方向，負責佢哋合理嘅賠償。」

「如果亞洲電視清盤之後，得番來嘅錢做到一個賠償畀員工，反而係一件好事，唔好再拖拖拉拉，因為投資者不斷話佢有幾多錢，都係得個『講』字，係咪仲要畀呢啲謊言、畀假希望再去拖拉啲員工呢？我覺得唔應該囉！我寧願來一個解脫，一個方向，會更加好。」

蔡國威在亞視多年，可有不捨？他說:「係唔捨得。一路講亞視係唔應該落得如此下場，亦都唔應該用咁樣方式結束，但係如果再係咁樣混帳落去，我真係寧願佢一刀切。係好唏噓無奈，真係唔想咁多人被玩！」

「我聽日唔會返去，唔知佢幾時熄掣，唔想睇呢一刻，但係解脫係應該，要睇佢咁結束，係唔忍心睇！」