【本報訊】書店毛利低，是最早向高空發展的商戶，50年代已有知識分子以開樓上書店來力保文化，如龍門、南山、學津等，80年代經濟蓬勃，樓上書店如雨後春筍，包括大量引入台灣書的樂文書店，為樓上書店開闢一片天空。
樂文書店85年在旺角開業，同年代還有曙光書店、青文書屋。樂文書店經理林璧芬當年拖着「汽水車」、揹起背包，將書由台灣運來香港，「慳番啲運費囉。」台灣書種較廣泛，吸引本地讀者，而且樂文可賺取滙率差價，90年代遂在銅鑼灣開分店。
她將人生最寶貴20多年放在書店，「呢行啲人都好和平，競爭都唔會好激烈。」可惜，港元貶值，成本又升，「樓上書店本叫二樓書店，但租金越嚟越驚人，越搬越高。」

誠品帶來更豐富的台灣書種，無異是樂文的衝擊。「誠品我都去過100次，專登去學嘢。但我哋為讀者揀成30年書，比較掌握咗佢哋口味。」
樓上書店揀書眼光須更獨到，才可叫書迷拾級而上，像當年樂文推介村上春樹，「最先其實係青文引入嘅，但起初冇乜人睇，搞到要大平賣。我哋覺得應該賣得喎，收返嚟大力推介，後來村上春樹紅咗，博益先買版權出版。」
八十代《百年孤寂》也有賴樓上書店作推手，MichaelSandel的《正義》最近大熱，其實在樂文書架已躺了近一年。「重點係要先了解呢班人嘅心態，先知咩會觸動到。」
在樂文這些樓上書店，有書香也有人味。有次一老顧客訂了批書久久沒拿，當林璧芬知道他原來已逝世時，在店內大哭起來。有人稱誠品來將開拓本地閱讀風氣，她托一托金絲眼鏡，淡定的說，「誠品可能係催化劑，但呢股風氣已經慢慢出咗嚟，書展人流由20萬去到95萬，都係好多本地同業努力撐出嚟㗎。」