韓劇《繼承者們》、《Doctors》女星朴信惠聽晚喺台北ATT SHOW BOX舉行粉絲見面會，佢今日抵台並出席下午喺寒舍艾美酒店舉行嘅記者會，佢一出即大晒國語話：「大家好，我是朴信惠。」

朴信惠透露自己已經有近兩年冇嚟台灣，佢坦言好掛住台灣，因為台灣係一個好溫暖嘅地方，特別係每到秋天就會特別想念台灣，事關佢之前曾經來台灣進行拍攝，現時仍有同台灣劇組聯絡。

朴信惠話聽晚嘅見面會同佢今個月9號喺香港舉行嘅見面會內容好相似，除咗會為粉絲解答煩惱外，亦都會為粉絲炮製便當。至於邊樣台灣美食最令佢難忘，佢就舉列話：「小籠包、火鍋、港式飲茶、珍珠奶茶等」，又話對台式火鍋嘅味道念念不忘，如果時間允許，佢就好想留台多天日日食餐飽。

提及想演乜嘢角色，朴信惠就話想挑戰做差人，或者演出散文小品嘅內容，不過如果真係可以做差人，佢就一定要好好調養身體來應付演出。同時朴信惠話聽日嘅見面會佢會自己做埋主持人，似乎佢已經苦練國語，到時同台迷傾偈。